BR LA UNION – Nangipeksa ti opinyon na ni sigud a presidente Rodrigo Duterte maipapan kadagiti nadlawanna nga irregularidad iti pannakaipasa ti National Budget para iti tawen 2025.
Segun iti dati a presidente, ti pannakaipasa ti National Budget a dandani “blangko” ti dadduma a paset ket ‘invalid’ ken saan rumbeng a naipasa sipud idi nai-transmit idiay kongreso para iti deliberasyon.
Impalagip pay ni Duterte iti lower house a nasken nga adalen ken ilinteg manen daytoy agsipudta saan kunana a maiyannurot iti linteg.
Kinunana a rumbeng laeng a kumiddaw ti Kamara ti pannakailawlawag no apay a simmangpet ti budget iti opisinada a dandani “blangko” gaputa kunana nga adda bileg ti kongreso a mangkuwestiyon ken pagpalawagen iti nangbukel ti nasao a pondo.
Immunan a pinalagipan ti sigud a presidente iti publiko a masapul nga umno ti pannakailawlawag kadakuada ti amin maipapan iti budget para iti tawen 2025 tapno nalawag no anya ti pakausaran dagitoy.
Kabayatanna, kinunana pay a saan nga umiso a baybay-an nga awan ti kargana ti sumagmamano a paset ti budget ken ponduan laeng nu kasapulan.
Ibilbilang ti sigud a Presidente daytoy kas maysa a kita ti anomalya ken panaglabsing iti linteg.
