Patien ti dati a Supreme Court Senior Associate Justice Antonio Carpio a marigatan ti legal team ni dati a Presidente Rodrigo Duterte a mangkuestion iti International Criminal Court (ICC) iti kinalegal ti pannakaaresto kenkuana.
Immunan a dinakamat ti legal counsel ni Duterte a kinuna ni Nicholas Kaufman a kuestionarenna ti maipagarup a ‘unlawful arrest’ a naaramid kenni Duterte para ti pannakadismiss ti kaso na.
Nupay kasta, kinuna ni Carpio a masapul nga isagana ni Kaufman ti napigsa a depensa no aramaten na ti kasta a pang atake iti kaso.
Inlawlawag ti sigud a mahistrado a saan nga inkonkonsiderar ti ICC ti wagas ti pannakaarestar ti maysa a suspek ken panangiturong sadiay The Hague tapno maipasidong ti hurisdiksion ti korte.
Kinunana nga agingga adda iti hurisdiksyon na ti suspek, malitis iti kaso ken kasapulan nga agsungbat iti akusado.
Kinaagpaysuananna kunana, nu maibasar kadagiti naglabas a kaso ti international court, saan nga ik-ikkan ti ICC ti konsiderasyon dagiti wagas ti pannakakemmeg ti suspek; maiyarig iti dayta iti pannakatiliw kenni Adolf Eichmann – iti German-Austrian official manipud Nazi Party a nasentensyaan ti pannusa a bitay gapo iti crimes against humanity, crimes against the Jewish people ken war crimes.
Inlawlawag met ni retired ICC Judge Raul Pangalangan, ti panangiturong kenni sigud a presidente Rodrigo Duterte iti International Criminal Court sakbay pay a marugyan ti panagdengngeg iti kaso na ket napateg a paset ti pannakalitis.
Nupay babalawen ti kampo ti sigud a presidente ti wagas ti pannakatiliw kenkuana, kinuna ni Pangalangan a babaen ti international criminal law, saan a makitkita ti isyu mainaig nu kasatno a nakemmeg ti maysa nga indibidwal a sumangsango ti arrest warrant manipud ICC.
Ti napateg kunana ket naiturongen ti nasao nga indibidwal iti hurisdiksyon ti international court para ti naan-anay a pannakadengngeg.
