Aprobadon ti Provincial Board ti Single-Use Plastic Ordinance ti La Union.
Manamnama a kadagiti masungad a bulan ket mangisayangkat ti Provincial Government of La Union (PGLU) iti nairut nga information, education, ken communication campaigns tapno ipakammo ti publiko seknan iti implementasion ti Single-Use Plastics (SUP) Code iti probinsya.
Maipalagip nga inaprobaran ti Sangguniang Panlalawigan (SP) ti Provincial Ordinance No. 342-2023, a napauluan iti “ENACTING THE SINGLE-USE PLASTICS (SUPs) AND OTHER REUSABLE AND DISPOSABLE MATERIALS CODE OF THE PROVINCE OF LA UNION.”
Ti main author ti nasao nga ordinansa ket ni Sangguniang Panlalawigan Member Pablo C. Ortega, chairperson ti Committee on Environment, Human Ecology ti Sangguniang Panlalawigan.
Sagudayen ti ordinansa ti regulasyon iti pannakaaramat dagiti single-use plastics (SUPs) ti sapasap a probinsya.
Parparegtaen pay iti ordinansa ti pannakaaramat dagiti Reusable Alternative Materials gapu ta mapatawan iti pannusa dagiti aglabsing ti daytoy bayat a maipaayan met iti insentibo dagiti indibidual ken negosyo nga agtungpal iti daytoy.
Gapu iti daytoy, al-allukuyen ti PGLU ti publiko, karaman dagiti pribado nga establisyimento a makikkaysa ti kampania ken liklikand ti agaramat kadagiti SINGLE-USE PLASTICS.
Mangnamnama ni Sangguniang Panlalawigan Member Pablo Ortega a babaen ti daytoy nga ordinansa ket maallokoy ti dadduma pay a lugar a mangiyemplementar iti panagbalbaliw para iti aglawlaw.
Tarigagay iti ordinansa a patibkeren dagiti agdama a polisiya dagiti local government units ditoy probinsiya para iti aglawlaw ken maitunos pay daytoy iti tarigagay a panagbalin ti La Union kas Heart of Agri-tourism iti Northern Luzon inton 2025.
