LA UNION – Posible a sumango iti kaso nga economic sabotage iti sidong ti Republic Act 12022 wenno Anti-Agricultural Economic Sabotage Law iti importer dagiti naipulist a lames, a kinumpiskar ti Bureau of Customs ken Department of Agriculture idi Oktubre 16 idiay Manila International Container Port (MICP).
Segun kenni Agriculture Secretary Francisco Tiu Laurel Jr. iti aganay 21 containers ti frozen mackerel wenno 567 metric tons ti lames a naggapo idiay China ket agbalor ti P178.5 million.
Kinuna met ni Customs Commissioner Bienvenido Rubio, nakumpiskar dagiti “hot” goods kalpasan a nadiskubre da nga awanan daytoy ti sanitary phytosanitary import clearance a makidkidaw kadagaiti agricultural imports.
Imbutaktak ni Sec. Tiu Laurel a dagiti nakumpiskar nga smuggled fish ket kukua ti Pacific Sealand Foods Corp.
Imbutaktak na pay iti baro ita a wagas ti panagkusit dagiti negosyante, tapno dacdackel ti maganansiya da.
Kinuna ti sekretaryo a dagiti lames ket na-glaze wenno nabalkot ti naingpis a yelo wenno ice, tapno agbalin a nadagdagsen nu mai-kilo.
Pattien ni Tiu Laurel a gundawayan koma dagiti kusit a negosyante iti closed fishing season a mangrugi inton bigat, November 1 ngem kinuna na nga awan ti shortage iti lames ditoy pagilian.
Impasigurado na nga amirisen a naimbag ti Dept. of Agriculture ken Bureau of Fisheries and Aquatic Resources dagiti lames sakbay a maibunong kadagiti evacuee wenno biktima ti napalabas a bagyo Kristine idiay Bicol region.
