Maramrambakan ti simbahang katolika ita nga aldaw ti Domingo iti “Solemnity of Christ the King”, maysa kadagiti kabaruan a piesta iti kalendario ti simbaan.
Naipasdek daytoy ni Papa Pio XI idi 1925 babaen ti encyclical Quas Primas nga addaan panggep a palagipan iti lubong – iti kangitingitan ti panagrang-ay ti sekularismo ken ti nalabes a nasionalismo – a ti pudno a kinakappia ken namnama ket mapataud laeng no ni Cristo iti agpannuray iti puso, pamilia, ken kagimongan.
Immuna a naselebraran iti “Solemnity of Christ the King” tunggal Oktubre, ngem kalpasan iti nagbalin a reporma ti Vatican II ket naiyakalis manipud maudi a Domingo ti liturgical year. Mangipasimudaag daytoy iti panaglappas ti sibubukel a tawen a panagrambak ken dagiti misteryo ti pammati, inwaragawag met ti simbaan a ni Kristo iti Alfa ken Omega, pagrugian ken pagpatinggaan.
Iti ebanghelio ita a tawen manipud kenni San Lucas, maipakpakita iti nagdumaan ti panagbalin nga ari ni Kristo, saan nga iti bileg no di ket iti krus a kadua dagiti dua a kriminal. Ti laksid ti panagsagaba ket impakitana iti asi kadagiti agbabbabawi nga agtatakaw ken inkarina, “Ita nga aldaw ket itugot kayo iti paraiso” – a pammaneknek a ti pagarianna ket nakabasar iti panagayat, pammakawan, ken panangisalakan.
Kabayatanna, daytoy a selebrasion ket maysa nga awis tapno sukimaten iti pammati no pudno a ni Kristo iti adda iti turay kadagiti biagtayo ken no iti panangawat kenkuana kas ari ket kaipapananna ti kinapakumbaba, panagserbi iti pada a tao, ken panagtalek iti agnanayon nga asina.#
