BR LA UNION – Nagpanawagan ni House Assistant Majority Leader Ernix Dionisio Jr. ti Manila kadagiti botante a saan nga ibotos dagti kandidato nga adda pakainaiagan da iti maipawpawil a Philippine Offshore Gaming Operators (POGO) inton Mayo 12 elections.
Impaganetget ni Dionisio nga adda agpa-ibotos a kandidato a makaal-ala ti suporta manipud POGO a sigurado a mang-protektar kadakuada apaman a maipatugaw dagitoy a kandidato iti puwesto.
Mamati ni Dionisio a ti desisyon ti Presidente nga ipawil iti POGO ket maysa kadagiti rason nu apay a naikkat ti Pilipinas iti money laundering watchlist ti Financial Action Task Force (FATF).
Kabayatanna, impaganetget ni House Minority Leader Zia Alonto Adiong ti Lanao del Sur a ti imbestigasyon ti Quad Committee iti POGO ken kriminal nga aktibidad ket maysa pay a nakatulong iti pannaka-ikkat ti paagilian iti FATF watchlist.
Uray ni Presidente Ferdinand Marcos Jr. ket nagpanawagan kadagiti botante a saan a suportaran dagiti kandidato nga adda pakainaigan da iti napalabas nga administrasyon, ngem saan na met a dinakamat iti nagan ni sigud a President Rodrigo Roa Duterte.
