LA UNION – Saan a dimmar-ay iti panagdengngeg ti House Quad Comm ita nga aldaw ni sigud a Presidente Rodrigo Duterte, agsipudta naibaga nan dagiti ammo na iti isyu ti extra judicial killings idi dimmar-ay iti panagdengeg ti Senado.
Segun kada House Majority Leader Manuel Dalipe, House Assistant Majority Leaders, Zambales Rep. Jay Khonghun ken La Union Rep. Paolo Ortega arigna agbuteng iti sigud a Presidente a sangwen ti salodsod dagiti miyembro ti Kamara ken pamilya dagiti biktima ti EJKs a kumidkddaw ti hustisiya.
Inwaragawag met ni Rep. Khonghun a nu kayat a talaga ti sigud a Presidente nga ipaayan ti umno nga impormasyon ti publiko seknan iti nadara a war on drugs ti Duterte administration, rumbeng a sumango iti Quad Comm.
Nasken a law-lawagan ti sigud a Presidente iti imbaga na nga inallokoy na dagiti pulis a “lumaban” tapno ma-justify ti pammapatay kadagiti suspek.
Impaganetget ni Khonghun a rumbeng nga imbestigaran a naun-uneg iti inaklon ni sigud a Presidente Duterte a responsable isuna kadagiti pammapatay ken ti claim nga adda ti reward system kadagiti pulis.
Nagpatulod ngamin ti surat iti kampo ni Duterte babaen ti abogado na a ni Atty. Martin Delgra III a saan a makadar-ay iti sigud a Presidente.
Immalma met ni Rep. Ortega iti surat ni Delgra ket imbaga a lumislisi laeng ti sigud a Presidente iti salodsod dagiti mammanday linteg.
