Nagpanawagan ni Senate President Sherwin Gatchalian kadagiti nagannak ken lokal a gobierno a papigsaen iti akemda a manglapped iti kinaranggas kadagiti pagadalan babaen ti nainget a panangipatungpalda ti Parent Effectiveness Service (PES) Program.
Inaramid ni Gatchalian iti panawagan kalpasan iti pammaltog ti maysa a pagadalan idiay Tacloban City a nakatayan ti uppat a tattao ken nasugatan ti sumagmamano a sabsabali pay.
Segun iti Senate President, nasken a maikeddeng no kasano a nakagun-od dagiti menor de edad ti paltog ken no kasano a nasursuroda nga usaren daytoy.
Impaganetgetna iti kinapateg ti akem ti pamilia iti panangsukog iti kababalin dagiti agtutubo tapno malapdan ti kinaranggas.
Panggep ti PES Program iti sidong ti Republic Act No. 11908 a papigsaen ti kabaelan dagiti nagannak ken parent-substitutes a mangiwanwan ken mangaywan kadagiti ubbing.
Ibilbilin pay ti linteg nga ipatungpal dagiti siudad ken munisipyo iti programa, bayat a ti Department of Social Welfare and Development (DSWD) iti mangbukel kadagiti katupag a learning modules.
Patien ni Gatchalian a malaksid iti seguridad ti pagadalan, napateg met ti aktibo a panangiwanwan dagiti nagannak iti uneg ti pagtaengan tapno malapdan ti panagkaro ti kinaranggas kadagiti agtutubo.###
