BR LA UNION – Impasigurado ni Senate President Tito Sotto III a natalged dagiti dokumento ti Senado kalpasan ti napasamak nga uram iti pasdek ti Senado itay agsapa ti Domingo.
Impasigurado ni Sotto nga amin a napateg a dokumento ti Senado, agraman dagiti iggem ti Blue Ribbon Committee, ket saan a naapektaran iti uram.
Imbaga ni Sotto a naipadamag ti insidente iti Bureau of Fire Protection (BFP) agarop alas 6:30 a.m. ken nagtaud ti apoy iti maikatlo a kadsaaran, partikular iti opisina ti Legislative Technical Affairs Bureau.
Dagus a nagresponde dagiti bombero ket indeklarada nga under control ti uram agarop alas 7:43 ti bigat, Nobyembre 30, 2025.
Agtultuloy ti ti imbestigasyon dagiti otoridad nu anya ti makagapu iti uram ken kit-kitaen da nu kasatno kadakkel ti nadadael.
Gapu iti panagusar ti danum a nangsebseb iti uram, napasamak ti panagubo ti danum nga agpababa iti Session Hall, a nagtaud iti apektado a kadsaaran.
Naki-koordinar ti Senado iti Bureau of Fire Protection ken internal security tapno maipatungpal dagiti kanayonan a wagas para iti kinatalged ti pasdek ken dagiti empleyado tapno malapdan dagiti kapada nga insidente.
Kinuna ti Senado nga agtrabaho ti maintenance team iti 24 nga oras iti inaldaw tapno agmaga ken matarimaan ti Session Hall ken masigurado a nakasagana daytoy para iti sesyon inton bigat, aldaw ti Lunes.
