BR LA UNION – Naideklara iti state of calamity kadagiti lugar ditoy Pilipinas a nakaru a nalayos ken nadidigra gapu iti bagyo Crising ken southwest monsoon wenno habagat.
Nanggubway iti bagyo Crising ken Habagat iti nakaru a panaglayus, ken immakaran iti adu nga umili.
Idiay Metro Manila, iti Quezon City ken Malabon City ket naipasidong iti state of calamity kalpasan a nakapasar dagitoy ti napigsa a panagtudo ken nakaru a panaglayos.
Kabayatanna, ita met nga aldaw ti manamnama a pormal a pannakaideklara ti state of calamity idiay Manila kalpasan a pinasingkedan ni Mayor Isko Moreno idi kalman a kasapolan a maipasidong ti siyudad iti nasao nga estado.
Iti Ilocos Region, naideklara metten nga under state of calamity iti ili ti Umingan idiay probinsiya ti Pangasinan kalpasan a nasurok 6,000 a pamilya ti naiyakar gapu iti kalamidad, agraman idiay Malasiqui.
Naipasidong metten iti state of calamity iti Calumpit, Bulacan; intero a probinsiya ti Cavite; Sebaste idiay Antique ken idiay Cebu City.
Iti deklarasyon ti state of calamity iti mangted dalan iti lokal a gobyerno tapno napartak a ma-access ti emergency fund ket maipatungpal iti relief operations tapno matulungan dagiti na-displace a residente.
Ipalubos pay ti deklarasyon dagiti lokal a gobyerno a makaipataw ti price freeze kadagiti kangrunaan a gagatangen.
