Inkonsidera dagiti sumagmamano a mamanday-linteg a “big deal” ken “small win” iti desiston ti Korte Suprema a saanen a mangipaulog pay ti Temporary Restraining Order (TRO) kontra ti impeachment proceedings ni Bise Presidente Sara Duterte.
Segun kadagiti miembro ti Kamara de Representantes, pakairamanan da Mamamayang Liberal party-list Representative Leila de Lima ket matuloy ti proseso agsipud ta awan met iti pammilin nga itantan ti panagdengngeg iti Abril 14.
Mangnamnama pay isun a a mangipakita ti “judicial restraint” iti Korte Suprema ken bay-an nga agpanuray ti proseso ti impeachment.
Kinuna met ni Akbayan party-list Representative Perci Cendaña a positibo ti saan a panangiruar ti TRO agsipud ta maikkan ti gundaway a sumungbat kadagiti alegasyon ti bise presidente.
Innayon ni De Lima, posible a nairanta dagiti petisyon kas “distractions” manipud iti impeachment proceedings ngem imbatad da Cendaña ken Gabriela party-list Representative Sarah Elago a nasken a maipamaysa ti panagdengngeg dagiti testigo mainaig ti confidential funds issue.
Iti biang ni House justice panel member Representative Joel Chua, daitoy nga impeachment ket saan a panggulo nu ketdi panagsagana iti umiso a panagpili ti lider inton tawen 2028.
