Nagpanawagan ti grupo dagiti mannursuro nga Alliance of Concerned Teachers – NCR Union para ti madagdagos a pannakairuar ti honorarium dagiti miembro ti electoral board a nagserbi idi May 12 midterm elections.
Segun kenni ACT-NCR Union President Ruby Bernardo, rinibu pay a mannursuro ti nagtrabaho ti nasurok 24 nga oras bayat a dagiti dadduma ket inusar ti bukod da a kwarta para ti taraon ken transportasyon tapno laeng makapagserbi iti eleksyon – iti saan pay a naawat dagiti honoraria da – nasurok makalawasen kalpasan ti panagbobotos.
Nakalidayan ti grupo a maipapan ti panagbayad ken benepisyo dagiti mannursuro ket kanayon a maud-udi, idinto nga agan-anus da iti pudot, bannog, ken peggad ti seguridad tapno laeng agserbi.
Kabayatanna, immuna metten nga imbatad ti Commission on Elections (Comelec) idi napalabas a lawas a nirugian dan iti panangibunong kadagiti honorarium dagiti mannursuro a nagserbi kas poll workers kasta met a panggep ti komisyon a makumpleto daitoy ti awan pay sangapulo nga aldaw kalpasan ti eleksyon.
Mainaig iti dayta, nag-apela ti grupo a mailaksid iti buis dagiti amin a kompensasyon nga adda pakainaigan na ti eleksyon ken ti panangipaay ti overtime pay kadagiti mannursuro nga agsobsobra pay ngem ti naituding nga oras ti panagtrabaho da.
