LA UNION – Pinatawan ti contempt ti Senate Committee on Women, Children, Family Relations and Gender Equality nga idaulwan ni Sen. Risa Hontiveros iti suspendido a mayor ti Bamban, Tarlac a ni Alice Guo kalpasan a saan manen a dimmar-ay iti committee hearing nga adda pakainaiganna dagiti krimen ti Philippine Offshore Gaming Operators (POGO) hub idiay Tarlac.
Malaksid kenni Guo, napatawan pay ti contempt da Nancy Gamo, Dennis Cunanan, Wenyi Lin, Seimen Guo, Juan Zhong Guo, Wesley Guo ken Shiela Guo.
Ni Senator Sherwin Gatchalian iti nangidatag ti mosyon a patawan ti contempt dagiti nasao nga indibidwal gapu iti agtultuloy a saan da a panagatendar ti hearing idiay Senado idinto a napatulod met dagitoy ti subpoena.
Sakbay ti hearing, nagpatulod ti surat ni Guo iti komite tapno ibaga a saan a makadar-ay gaputi isyu ti salun-at ken pannaka-apekar ti mental health daytoy.
Nakatuding nga isumite ni Hontiveros kenni Senate President Francis “Chiz” Escudero iti listaan dagiti napatawan ti contempt tapno maiyetnagan dagitoy ti warrant of arrest.
