BR LA UNION – Addan iti natalged a kondisyon dagiti 23 nga indibiduwal a nagsagaba ti pannakadun-dunor, kalpasan ti panagdinnungpar ti maysa a van ken SUV idi bigat ti Domingo, Hunyo 22, 2025 iti kawatiwatan ti national highway, sakop ti Barangay Ili Sur, San Juan, La Union.
Iti nasao nga SUV ket minaneho ti maysa a 13-anyos a balasitang, maysa a grade-7 student, ken residente ti La Union. Kadwa na a nakalugan iti nasao a behikulo iti padana a menor de edad nga agtawen ti 14.
Iti met van nga addaan ti 21 a pasaheros a pakairamanan ti driver ket naggapo idiay Metro Manila ken agturong da iti Norte.
Iti pannakiuman ti Bombo Radyo La Union kenni PMAJ Reynante Organista, agdama a chief-of-police ti ili a San Juan, maipagarop nga immagaw ti linya iti SUV a puon ti nagdinnungparan da iti kasinnabat na a van.
Napasamak ti aksidente iti sharp curve iti nasao a lugar agarop alas 5:14 ti bigat idi Domingo.
Iti agdama, nakarwaren iti ospital ken addan iti natalged a kondisyon dagiti biktima.
Kabayatanna, agtultuloy iti imbestigasyon dagiti otoridad ket padaanan ti pagdur-asan daytoy a damag.
