LA UNION – Kagiddan ti nagsasaruno a pannaka-ideklara ti State of Calamity iti adu a lugar ditoy Pilipinas gapu iti nasaknap a layus itay nabiit, impalagip ti Department of Energy ti kaadda ti price freeze kadagiti produkto a liquefied petroleum gas (LPG).
Segun iti DOE, epektibo ti price freeze kadagiti nasao a produkto iti uneg ti 15 nga aldaw manipud ipannakaideklara ti State of Calamity .
Iti sidong daytoy, maiparit nga ipangato ti presyo dagiti LPG nga 11 Kg agpababa, agraman dagiti produkto a kerosene, ngem mapalubosan ti anyaman a flat-price proposal.
Karaman kadagiti lugar ket idiay Manila, Marikina, Navotas, Quezon, Bataan, Pampanga, Bauang (La Union), Bulacan, Cavite, Pinamalayan (Oriental Mindoro), ken probinsiya ti Rizal.
Gaputa agduduma ti aldaw ti deklarasyon ti State of Calamity kadagiti munisipalidad ken probinsiya, masurot ditoy ti immun-una a petsa ti deklarasyon, maibasar iti resolusyon nga inruar dagiti LGU, kas iti City and Provincial boards.
