BR LA UNION – Pinatay ti saan pay a nabigbig a suspek a riding-in-tandem iti maysa a teacher ken sigud a Miss Earth runner-up
idiay Brgy. Cabaritan, San Manuel, Isabela idi rabii ti Huwebes, Pebrero 13, 2026 agarop alas 6:45 ti rabii.
Ti biktima ket nabigbig a ni Lullete Jane Ramilo-de Guzman, agtawen ti 32 ken residente iti nasao a lugar.
Maibasar iti inisyal nga imbestigasyon dagiti otoridad, kadwa ti biktima ti ama na ken annak na a nakalugan iti Toyota Fortuner nga agawid iti balay da.
Idi bimmaba ti ama na tapno lukatan ti gate, ginundawayan ti suspek ti simrek ken immasideg iti biktima kagiddan ti panangpaltog na iti maestra.
Dagus a naglibas dagiti suspek a nakalugan ti motorsiklo ken nagturong da iti national highway idiay Brgy. District 3, San Manuel, Isabela.
Kabayatanna, inturong ti ama na iti biktima idiay Manuel A. Roxas District Hospital idiay Roxas, Isabela, nguem indeklara ti doktor a dead on arrival.
Awan ti asawa ti biktima a ni Dr. Clifford dela Cruz idi napasamak ti krimen, agsipudta adda isuna idiay Manila para iti training.
Ni Lullete ket simmalip iti 2013 Miss Earth Philippines ken maysa isuna a simrek kadagiti lima a runners-up.
Agtultuloy ti imbestigasyon dagiti otoridad tapno duktalen ti kinasiasino dagiti suspek ken motibo ti krimen.
