BR LA UNION – Inbinglay ni Rep. Janette Garin ti tinawen a birok dagiti kompaniya a kukua ti pamilya Discaya, base kadagiti dokumento a naisumite iti Securities and Exchange Commission (SEC).
Segun kenni Garin, nakakad-kadlaw ti dakkel a panagngato ti birok dagiti nasao a kumpanya sipud pay idi tawen 2016.
Iti presentation ket paset ti mas nalaw-lawa a panangsukimat iti pinansyal a garaw dagiti negosyo ti Discaya couple, nga ita ket maim-imbestigaran seknan iti alegasyon a posible nga adda irregularidad iti kontrata dagiti kompanya a kukua ti nasao a pamilya.
Nagmosyon pay ni Iloilo Rep. Janette Garin nga obligaren iti Discaya group of companies nga agsumite ti kumpleto a listaan dagiti proyekto nga inaramid da idiay Western Visayas sipud idi 2015.
Naamwan nga adda dagiti proyekto idiay Iloilo a kurang iti documentation, nagduma ti contractor records, ken awan ti transparency boards iti site.
Dagiti mairam-raman a kumpanya ket iti St. Gerrard Construction, St. Matthew General Contractor, ken dadduma pay a kumpanya ti Discaya group.
Ranta ti mosyon ni Garin a maamwan nu adda pattern ti anomalya dagiti proyekto iti rehiyon, nangruna ket adda dagiti report a kimmaru ti layos iti sumagmamano a barangay kalpasan ti implementasyon ti sumagmamano a flood mitigation structures.
