LA UNION – Plano ti Department of Science and Technology (DOST) a mangipasdek ti tradisyunal ngem moderno nga Ivatan House idiay probinsiya ti Batanes.
Daytoy ket ponduan ti ahensya iti sidong ti Assessment, Development, and Preservation for Typhoon and Earthquake-Resilient Ivatan Houses project.
Segun iti ahensya, nairanta ti nasao nga inisyatibo tapno maprotektaran iti architectural heritage dagiti Ivatan kontra kadagiti kalamidad a masansan a pagnaan wenno maapektaran kadagiti lumab-labas a bagyo.
Iti maysa a waragawag, imbaga ni Cagayan State University OIC President Arthur Ibañez, iti nasao a proyekto ket agusar da ti moderno a pundasyon para kadagiti nasao a babbalay.
Agusar da ti bato iti panangaramid ti diding ken atep, tapno saan a maisakripisyo iti cultural value ti Ivatan House.
Inlawlawag ti DOST nga agserbi daytoy a monitoring station ti ahensya da para kadagiti bagyo ken gingined.
Nairanta daytoy a madetermina nu kasatnu katibker dagiti istraktura a pagibasaran iti sumarsaruno pay a proyekto.
Dandani amin a babbalay idiay Batanes ket naaramid iti bato ken kayo a makab-kabilan ti apog wenno lime idinto a dagiti atep na ket naaramid ti cogon grass.
