Panggep a mangipasdek iti Department of Science and Technology iti tradisyonal ngem moderno nga Ivatan House idiay probinsya ti Batanes.
Daitoy ket pondoan ti ahensya iti sidong ti Assessment, Development, and Preservation for Typhoon and Earthquake-Resilient Ivatan Houses project.
Segun iti DOST, panggep daitoy nga inisyatibo a maprotektaran ti architectural heritage dagiti Ivatan gapo metten kadagiti didigra a kadawyan nga lumablabas ken dumupduprak iti probinsya.
Kinuna ni Cagayan State University OIC President Arthur Ibañez, daitoy a proyekto ket mangusar iti modern a pundasyon para iti nasao nga balay.
Agusar da pay iti bato iti panangbukel kadagiti dingding ken bubong na tapno saan a makasakripisyo ti cultural value ti Ivatan House.
Inlawlawag ti DOST nga agserbi daitoy a monitoring station ti ahensya para kadagiti bagyo ken ginggined.
Target daitoy a maamwan nu kasatno katibker ti nasao nga istraktura a pagbasaran met para kadagiti sumarsaruno pay nga proyekto.
Agarop amin a kabalayan idiay Batanes ket naipasdek babaen ti bato ken kayo ken makabkabilan ti apog wenno lime bayat nga iti bubong ket naaramid babaen ti cogon grass.
