LA UNION – Nagpawagan ni dati a Senador Antonio ‘Sonny’ Trillanes patakyasen iti puwesto ni Vice President Sara Duterte mainaig iti kallabes a kababalinna iti chamber hearing a nangtalantan ti naisingasing a budget ti Office of the Vice President (OVP).
Iti online post, kinuna ni Trillanes a saan laeng a ti panaggastos ti P125 million confidential funds ti impeachable offense ti Bise Presidente.
Mainayon pay ditoy kunana iti bribery ken korapsyon gaputi maipagarop a panangawat na iti dua a tseke nga aggatad iti 14.4 milion manipud iti sigud a nga economic adviser ni sigud a President Rodrigo Duterte a ni Michael Yang bayat ti panagtugawna kas mayor idiay siyudad ti Davao.
Maipalagip a bayat ti panagdengngeg ti proposed budget ti OVP para iti tawen 2025, nagtalinaed a natibker ti takder ni VP Sara a saanna a sungbatan dagiti saludsod maipapan iti panaggastos ti opisinana iti P125 milyon a confidential funds iti uneg ti sangapulo ket maysa nga aldaw.
Segun ken ni Duterte, awan ti pakainaigan dagiti nasao nga alegasiyon iti diskusyon maipapan iti budget ti OVP para iti sumaruno a tawen.
Kabayatanna, immuna ti daytoy, imbaga ni Trillanes ti opinyonna maipapan iti insidente idi Agosto 27.
Kinuna ti sigud a senador a pattienna a panawenen tapno sangsangkamaysa a dumngeg dagiti mammanday-linteg tapno mapatakyas ni Duterte iti posisyon.
