LA UNION – Siniguro ni sigud a Sen. Antonio Trillanes IV nga addaan isuna ti naan-anay nga impormasyon ken ebidensya iti indatag na a kaso kontra kada sigud a President Rodrigo Duterte ken Sen. Christopher “Bong” Go.
Adda pakainaiganna daytoy iti maipagarop a sinerrek a frigate deal ti napalabas nga administrasyon.
Personal a nagturong idi Miyerkules iti Department of Justice (DOJ) ni Trillanes nga imet na iti nakaad-adu a dokumento.
Reklamo a plunder kontra kadagiti sigud a President Duterte, Sen. Bong Go ken dadduma pay nga opisyal ti sigud nga administrasyon iti indatag na.
Karaman pay a nakaswan da sigud a Defense Usec. Raymundo Elefante, sigud a Budget Usec. Lloyd Christopher Lao, ken sigud a Philippine Navy (PN) chief Admiral Robert Empedrad.
Nagramot daytoy iti maipagarop a P16 billion a Philippine Navy Frigate Acquisition Project a maipagarop a sinerrek dagiti dua, itilaksid nga addan ti sabali a rekomendasyon dagiti mangimat-maton nga opisyal.
Mamati ni Trillanes nga adda napasamak nga anomalya iti panangipatungpal ti nasao a proyekto.
Immuna a nangidatag ti kaso ni Trillanes idi Hulyo 5 gapu iti maipagarop a panangusar da Duterte ken Go iti bileg ken posisyon da tapno makaala ti bilyon a pisos a balor ti government projects a pabor iti bukodda a pamilya.
Silulukat met iti Bombo Radyo iti biang da sigud a Preisdente Rodrigo Duterte ken Sen. Go tapno sungbatan ti nasao nga isyu.
