BR LA UNION – Kiddawen ni US President Donald Trump iti Saudi Arabia ken iti Organization of the Petroleum Exporting Countries (OPEC) nga ibaba ti presyo dagiti produkto a petrolyo.
Maysa laeng daytoy kadagiti nagbalin a linaun ti virtual speech na iti World Economic Forum a maisay-sayangkat idiay Davos, Switzerland.
Binallaaganna pay dagiti negosyante iti intero lubong, a rumbeng nga idiay US nga agaramid da ti produkto.
Kinuna na a nu saan da nga aramiden daytoy ket patawanna iti nangato a taripa dagiti produkto da.
Plano na met a kasarita ni Saudi Crown Prince Mohammed bin Salman tapno isingasing nga aramiden a maysa a trilyon a dolyar ti ilatang na nga investment idiay US.
Kasaruno daytoy iti anunsiyo ti Saudi Crown Prince a plano na ti ag-invest ti $600 bilyon idiay US idi nagsarita da kenni Trump iti telepono.
Innayon pay ni Trump nga iti kanito nga agsango da iti Saudi Crown Prince ket sigurado a saan nga agkedked daytoy nu kiddawanna ti kanayunan nga investment.
