Nairekord ti Department of Health (DOH) ti immuna a kumpirmado nga kaso ti ligaw na bala idi holiday season.
Ti biktima ket maysa a 19-anyos a lalaki a taga-Davao del Norte a natay kalpasan a natirwan ti stray bullet bayat ti panagragragsakna iti ruar ti balayda.
Gapu iti daytoy, dimmanon iti tallon ti dagup a bilang dagiti natay idi napalabas a selebrasion ti Paskua ken Baro a Tawen.
Maibasar iti datos ti DOH agingga idi kalman, aldaw ti Sabado, Enero 4, dimmanonen iti pakabuklan 771 ti bilang dagiti biktima ti paputok.
Nangatngato daytoy iti 27.6% no idilig iti nairekord idi napan a tawen.
Immadu pay ti bilang dagiti biktima kalpasan a nainayon ti 39 a baro a kaso ti fireworks-related injuries idi bisperas ti Baro a Tawen idinto a siam a kaso met ti nainayon idi Enero 2 ken 19 a baro a kaso iti napalabas nga aldaw.
Iti dagup a bilang, dua ti biktima a puros amin ubbing nga agtawen iti 3 ken 2 iti aksidente a nakatilmon iti lusis.
Agtaltalinaed dagiti kwitis, 5-star ken boga a kangrunaan a pakaigapuan ti fireworks-related injuries a nagresulta iti pannakauram ti kudil ken seryoso a kaso ti amputation wenno pannakaputed dagiti paset ti bagi.
Dagiti agtutubo ken menor de edad ti kangrunaan pay laeng a biktima, isu nga ipalpalagip manen ti DOH kadagiti nagannak a bantayan dagiti ubbing ken saanda nga agusar kadagiti nabati wenno di pay bimtak a paputok ken siguraduen nga adda iti first-aid kit no adda pannakadangran gapu iti paputok.
