BR LA UNION – Lima ti natay agraman ti 60-anyos a baket ken maysa pay a babai bayat a 15 dagiti nakaru a nadun-dunor agraman ti driver ken alternate driver,
kalpasan a natinnag ti nagluganan da a pampasahero a bus iti rangkis idiay Camarines Sur.
Dagiti nasugatan ket naiturong ken matam-taming iti ospital idiay Tagkawayan, Quezon.
Segun kenni ni Police Capt. Bernie Undecimo, agdama a hepe ti Del Gallego PNP, napasamak ti insidente agarop alas 3:25 ti parbangon idi kalman, Disyembre 26 idiay Barangay Magais-I, Del Gallego paset ti Andaya Highway.
Maibasar iti imbestigasyon, naggapo ti DLTB bus idiay Cubao, Quezon City ken agturong idiay Gubat, Sorsogon
Segun kadagiti nakalasat, kellaat a napukawan ti puot ti driver ket napukaw na ti kontrol iti manibela.
Istorya met ti kasinnukat na a driver, nagsinnukat da ti puwesto idi nakadanon da idiay Tabogo, Camarines Norte agturong idiay ili ti Gubat, Sorsogon.
Mainaig ti daytoy, imbaga ti Land Transportation Franchising and Regulatory Board (LTFRB), a mangisay-sayangkat da ti naun-uneg nga imbestigasyon iti napasamak nga aksidente.
Kinuna ni LTFRB Chairperson Atty. Vigor D. Mendoza II mangiyisyu da ti show cause order (SCO) iti bus company tapno pagpalawagen ken maamwan nu sumursurot met laeng ti umno a protocol ti kompanya, a mangsiguro ti kinasagana iti mental ken pisikal a kapasidad dagiti drivers.
