LA UNION – Naidatagen iti kaso a murder ken frustrated murder kontra iti nabigbig laeng iti alyas a “Martin” a matudtudo a suspek iti napasamak a pammaltog idi bigat kalman idiay Barangay Central East, Bauang, La Union a nakatayan iti maysa a babai a negosyante ti nateng.
Iti pannakiuman ti Bombo Radyo La Union kenni Pol. Mayor Cresencio Abila Jr., agdama a chief-of-police idiay ili ti Bauang, naarestar ti suspek babaen iti panangiladawan ti biktima a ni Joel Gomez.
Segun kenni Abila, ni Gomez iti target koma a paltugan ti suspek, ngem iti natirwan ket iti babai a biktima a dagus a natay gaputi pannakapaltog ti ulo na.
Nabigbig ti pimmusay a biktima a ni Milagrita Patacsil, 52-anyos, balo ken residente ti Barangay Lower San Agustin.
Agtultuloy iti imbestigasyon dagiti otoridad iti nasao a kaso ken duk-duktalen da iti kinasiasino iti maysa a suspek.
Segun kenni Abila, ilibak ni alyas Martin iti maiyak-akusar kenkuana isunga kasapolan a ma-review da a nalaing iti CCTV iti nasao a lugar, tapno madetermina iti pudno a napasamak.
Immunan a naipadamag nga imon ti makitkita a motibo iti nasao a krimen.
Iti agdama, nakabalud ti suspek iti Bauang Police Station bayat nga at-large iti maysa pay a saan a nabigbig a suspek.
