Nag-surrender sadiay General Trias Police Office idi rabii ti Dominggo, Marso 8 dagiti uppat a suspek iti hazing a nakatayan ti 19-anyos a maritime student a ni Kenneth “Ken” Alcedo a nagtarigagay a sumrek iti Tau Gamma Phi fraternity.
Segun kenni Cavite Public Information Office Chief Police Liuetenant Sara Jane Drio, personal a nag-surrender dagiti uppat, babaen metten iti pammilin dagiti abogado ken pada da a miembro ti organisasyon.
Nabigbig dagiti suspek nga isuda John Lee Tuliao, Archie Rosil, Kenneth Ompod, ken John Rey Torrecampo. Napagammoan a dua kadakuada nga uppat ti naaddaan pay ti gundaway nga iturong ti biktima idiay ospital.
Maipalagip a pimpiman nga inturong da idiay General Trias Medical Center ni Alcedo ken kinuna nga isuna ket biktima ti hit-and-run. Maisupadi daitoy iti natakuatan ti attending physician a nakitaan ti bagi ti biktima kadagiti nagduduma a pasa ken sugat.
Adda pay iti indikasyon ti panag-torture agsipud ta nakitaan iti nagbaetan ti pribado a paset ti bagi na kadagiti bukel ti sili.
Agtultuloy ti panangallukoy dagiti otoridad kadagiti dadduma pay a suspek ken miembro ti fratenity a makitinnulong iti imbestigasyon para iti naparparatak a pannakakemmeg dagiti nangpatay kenni Alcedo.
