Dumanonen iti $8 million wenno nasurok iti P471-M ti pakabuklan a tulong ti inpaay ti Estados Unidos para kadagiti Pilipino a biktima ti nagsasaruno a bagyo ita a tawen ditoy pagilian.
Immunan a kinuna ti United States Agency for International Development (USAID) a malaksid iti $1-M a kanayunan a humanitarian assistance nga inyanunsyo ni US Defense Secretary Lloyd Austin III iti panagbisita na ita a lawas, nakaipaay pay ti Amerika ti lagpas $7 million a gatad ti typhoon-related aid para iti Pilipinas.
Ti kabaruan a tulong ket naipaay para kadagiti biktima ti Super Typhoon Pepito a nag-displace kadagiti residente ken nagibati kadagiti perdisyon ti imprastraktura ken sektor ti agrikultura.
Naliday met ti USAID a naapektaran ti 2 milyon a tattao ti nagkakadwa nga epekto ti bagyong Nika, Ofel ken Pepito a nangigubuay ti nalawa a layos ken panagregga-ay ti daga kadagiti napalabas a lawas.
Mainaig iti daitoy, kinuna ti US agency a makatulong ti nasao a pondo tapno dagos a masungbatan ti pagkasapulan dagiti vulnerable communities babaen ti panangipaay kadagiti emergency shelter, danom, sanitation ken hygiene assistance kasta met dagiti napapateg a relief supplies.
