BR LA UNION – Agpel-peligro a matay iti nasurok 14 million a tattao inton madanon ti tawen 2030 gapu iti panangisardeng ti administrasyon ni US President Donald Trump iti US Agency for International Development (USAID).
Maibasar daytoy iti panagadal nga impablaak iti prestihiyoso a Lancet medical journal kagiddan ti panagu-ummong dagiti business leaders para iti UN conference idiay Spain ita a lawas, nga addaan tarigagay a papigsaen ti kumapkapsot nga aid sector.
Nadiskubre iti panagadal nga one-third iti nasao a bilang wenno nasurok 4.5 milyon nga ubbing, partikular dagiti agtawen ti 5 agpababa iti matay inton 2030 wenno 700,000 nga ubbing kada tawen.
Iti maysa nga statement, kinuna ti co-author ti Lancet report a ni Davide Rasella, para kadagiti low ken middle income countries iti pakaituronganna iti makapadanag a resulta ti panangpukaw ti US aid agency iti global pandemic wenno nalawa nga armed conflict.
Nakailanad pay iti report a posible nga agsardeng ken masayang iti dua a dekada a progreso iti salun-at kadagiti vulnerable populations.
Patta-patta ti grupo dagiti researchers a maibasar iti datos manipud iti 133 a pagilian, nalapdan ti USAID funding iti 91 milyon a pannakatay kadagiti dumur-dur-as a pagilian iti baetan ti 2001 ken 2021.
Maipalagip nga imbaga itay kallabes ni US Secretary of State Marco Rubio a kinanselar ti administrasyon ni Pres. Trump iti nasurok 80% ti amin a programa iti USAID.
