Inyanunsyo ti Pentagon a dagos a maugian ti panagproseso ti panangikkat kadagiti nasurok-kumurang sangaribo a transgender troops iti US military,kas maibasar ti pammilin ni US President Donald Trump a maipariten dagiti transgenders nga agserbi iti militar ti pagilian da.
Segun iti memo ni Defense Secretary Pete Hegseth, dagiti transgender personnel a boluntaryo a nangipadanon ti intensyon a pumanaw sakbay idi Marso 26 ket dagos a maasikaso para ti separasyon bayat a dagiti saan met a boluntaryo ket mapilit metlaeng a maikkat iti serbisyo inton madanon ti Hunyo 6 (para kadagiti active-duty) ken Hunyo 7 (para kadagiti reserves).
Adda pakabuklan 4,240 a miyembro ti military ti addaan ti diagnosis a gender dysphoria idi napalabas a tawen, segun ti Department of Defense. Manipud iti nasao a bilang ket nasurok-kumurang sangaribo ti masakopan ti baro nga allagaden.
Nangiruar payen ni US President Trump ti executive order idi Enero 27 a kinunana nga ti “false gender identity” ket saan a mailinya ti nangato a standard ti serbisyo militar.
Napasarunuan pay daitoy ti Pentagon memo idi bulan ti Pebrero a nagkuna met a maikkaten amin a transgender troops malaksid kadagiti addaan iti special waiver.
Iti polisiya ket paset ti serye dagiti panagbalbaliw mainaig ti transgender service members — a nagbalin a nawaya iti sidong ti Democratic administrations, ken nagbalin met a nairut ita a liderato ni Trump.
