Pinasingkedan ni National Bureau of Investigation (NBI) Director Jaime Santiago ti pannakarestar ti maysa a vlogger idiay Cebu gapo iti panangiwaras ti fake news a parparuaren na nga idurduron ni Presidente Ferdinand Marcos Jr. ti panangaramid ti linteg nga aramiden a legal ti droga ditoy pagilian.
Maibasar ti NBI-Central Visayas Regional Office, kabayatan ti panangisayangkat da ti cyber patrolling, nakita da ti mays a vlogger a nagpost ti altered post nga addaan ti caption nga “legal na daw ang droga, grabe ka naman Marcos”.
Segun kenni NBI chief Santiago, dagos nga inaksyonan ti NBI-Central Visayas Regional Office ti issue ken nangisayangkat iti operasyon para ti pannakarestar ti vlogger a ni Wendolyn Apduhan Magalso.
Emosyonal met nga inlawlawag ti content creator a naaramid na laeng daitoy tapno umado ti biruk na ken tapno matulongan na ti asawa na a maymaysa nga agsapsapol para iti pamilya da ken innayon na pay a bassit met ti nabirukan na iti daitoy a post.
Agsangsagnit met isuna a kummiddaw ti pammakawan kenni Presidente Ferdinand Marcos Jr.
Kinuna pay ti NBI chief a rugyan dan ti imbestigasyon kadagiti dadduma pay a vloggers.
Pinaregta ti opisyal iti publiko nga i-fact check pay dagiti impormasyon iti social media ken nagpakdaar a maysa nga criminal offense ti panangiwaras ti saan nga umiso nga impormasyon.
Kabayatanna, sumango met iti suspek kadagiti kaso babaen ti Article 152 ti Revised Penal Code, in relation to the Cybercrime Prevention Act of 2012.
Apaman a ma-convict, mabalin a makulong daitoy ti manipud innem a bulan agingga innem a tawen malaksid pay ti multa a dumanon ti agingga P200K.
