BR LA UNION – Maamwan ti publiko ita nga aldaw ti Lunes, Marso 16, 2026 nu agsumite ni Vice President Sara Duterte ti palawag wenno sungbat seknan iti dua nga impeachment complaints a naidatag kontra kenkuana.
Segun kenni House Committee on Justice member ken Bicol Saro Party-list Representative Terry Ridon, talantanen da iti nakatuding a panagdengngeg inton Marso 18, iti posible a conflict of interest iti dua nga abogado ti Bise Presidente nga isuda Atty. Reynold Munsayac ken Michael Poa.
Maipapan iti alegasyon dagiti ’18 Marines’ a “maleta” a maipagarop a naglaun ti riniwriw a kuwarta tapno pasoksokan iti sumagmamano a pulitiko, imbaga ni VP Sara nga aguray da laeng iti posible a baro nga ebidensya sakbay nga agkomento.
Impaganetget na, saanna a personal a baklayen dagiti isyu kontra kenkuana, ngem saanna met a palabsen iti ilegal nga aramiden kontra iti pagiliawn kas ti korapsyon ken panagabuso.
Iti sabali a bangir, iti isyu ti 2028 national elections, kinuna ni VP Sara a ti potensyal a running mate na a maipagarop a ni-recruit na, ket saan pay a nakapagdesisyon nu tumaray wenno saan.
Kinuna ti Bise Presidente nga adda uppat a personalidad ti immasideg kenkuana tapno ikonsidera a kandidato para senador inton 2028.
Saanna metten a dinakamat ti nagan dagitoy.
Maipalagip nga idi bulan ti Pebrero, inyanunsiyo ti Bise Presidente a tumaray iti kina-presidente inton 2028 elections.
Kagiddan daytoy, indaulwan ni VP Sara ken sigud a presidente ken Pampanga Representative Gloria Macapagal-Arroyo, iti panagpirma iti maysa nga coffee table book kas panang-lagip iti maika-90 nga anibersaryo ti Office of the Vice President idiay Davao City.
Binisita da pay iti pop-up exhibit a nakaitampokan ti amin a nagbalin a bise presidente ti Pilipinas.
Impaayan importansiya ni Duterte iti legacy ni Arroyo, agraman ti ama na, daydi sigud a Presidente Diosdado Macapagal, kas maymaysa a father-and-daughter pair nga agpada a nagserbi kas VP ken Presidente.
