BR LA UNION – Adda obligasyon ni impeached Vice President Sara Duterte kadagiti umili a dumar-ay iti maisayangkat nga impeachment trial ken sangwen dagiti akusasyon kontra kenkuana.
Daytoy ti impaganetget ni House Deputy Speaker ken La Union Congressman Paolo Ortega.
Segun kenni Ortega, nu plano ni Duterte a tumaray iti mas nangat-ngato a posisyon kas iti kina-presidente, mas nangat-ngato met ngarud ti namnamaen a kuwalipikasyon na, isunga rumbeng laeng a personal daytoy nga umatendar ken agpalawag iti publiko.
Nupay kasta, mamati ni Ortega a saan a dumar-ay ti Bise Presidente.
Kinuna na a paset daytoy iti estratehiya ti kampo ni Duterte, kas ti saanna a panagparang kadagiti naglabas a panagdengngeg idiay Kamara.
Iti likudan daytoy, siniguro ni Ortega a nakasagana dagiti prosecutor iti anyaman a senaryo, kabilang iti posible a panang-boycott wenno panang-delay iti proseso ti depensa.
