BR LA UNION – Inaresto dagiti kameng ti National Bureau of Investigation ti maysa a grupo dagiti Taiwanese a maipagarop a karaman iti scamming activities idiay Cebu City.
Segun iti NBI, daytoy ket buklen ti 16 a lallaki ken maysa a babae bayat a naaresto dagitoy iti maysa a subdivision iti nasao a lugar.
Maibasar iti datos ti NBI, walo kadagiti naaresto a gangannaet ket adda sangsangwen da a kaso ken addaan pay ti warrant of arrest manipud iti pagilian da.
Iti inisyal nga imbestigasyon dagiti otoridad, agpar-parang a pada-da met laeng a Taiwanese iti bik-biktimaen ti grupo.
Segun kenni NBI-Special Task Force Agent Ranier dela Cruz, mabalin a kabilang ti grupo iti Four Seas Gang a maysa a criminal group a nakabase idiay Taiwan.
Iti naisayangkat nga operasyon ket kinumpiskar dagiti otoridad iti 17 computers, 23 mobile phones, ken dua a crypto wallets.
Nakaragsakan met ni Taiwan police attaché Matt Shen iti pannaka-aresto dagiti suspek ken nagyaman iti liderato ti NBI.
