BR LA UNION – Napadayawan iti dua a pulis ditoy siyudad ti San Fernando a nangisalbar ti biag ti maysa nga agtutubo a ginandat na ti agpakamatay babaen iti panag-tapuak na iti overpass iti sentro ti siyudad ti San Fernando.
Dagiti napadayawan ket isuda: PSSg Quincy Von Obillo ken PMSg Junvy C Buduan, agpada a kameng ti City of San Fernando Police Station, La Union Police Provincial Office (CSFPS, LUPPO) naka-assign dagitoy kas Patrollers iti Police Assistance Box 6 (PAB 6) a masarakan iti sirok ti Overpass.
Nabigbig iti inaramid dagiti pulis, a dagus a nagresponde tapno isalbar ti maysa a teenager a nanggandat a tumpuak iti overpass idi malem ti May 3, 2025.
Maibasar iti report, maysa a concerned citizen iti nagreport kada Obillo ken Buduan nga adda ti maysa a lalaki nga immuli iti overpass ket ginandat na ti tumpuak.
Iti panagresponde ni Obillo, dagus na nga inarakop iti siket ti lalaki a nakatakder iti railings. Dagus met a nagturong iti lugar ni Buduan kadwa na ti sumagmamano pay a traffic enforcers tapno tulongan ti lalaki a maibaba iti overpass.
Inturong dagiti otoridad ti biktima iti Ilocos Training and Regional Medical Center (ITRMC), para iti medical attention.
Kalpasan ti pannakataming na, natalged a nakaawid daytoy kadwa ti inana.
Mainaig ti daytoy, inallokoy ti PNP iti publiko nga agridam iti kondisyon wenno kasasaad dagiti annak wenno siasino pay a miyembro ti pamilya tapno matulongan dagitoy nu adda man ti parikot wenno paka-buriboran da.
Mabalin met a kiddawen ti tulong dagiti otoridad wenno dagiti maseknan nu adda madlawan a senyales ti depression ken anxiety iti maysa a miyembro ti pamilya.
