LA UNION – Agtultuloy iti isaysayangkat nga imbestigasyon ti Bureau of Fire Protection (BFP) San Fernando seknan iti pannakauram ti maysa a pagtaengan iti Purok 4 ti Barangay Sevilla, San Fernando City, La Union agarop alas 11:00 idi rabii.
Nagtitinnulong dagiti kameng iti BFP San Fernando ken Fil-Chinese volunteer fire brigade a nangsebseb iti apoy manipud iti maur-uram a dua a kadsaaran a pagtaengan idi rabii.
Base iti inisyal nga impormasyon, maipagarup nga adda ti nag-ispark iti kaabay daytoy a balay a nakairamanan metten ti nasao a pagtaengan a kukua ti managan Naty Flora, 80-anyos.
Nagpaut iti fire fighting operation iti nasurok maysa nga oras sakbay a naideklara a fireout.
Awan met ti nadangran iti nadakamat nga insidente.
Naamwan nga awan ti agnanaed iti nadakamat a pagtaengan, dua a bulanen iti napalabas.
Numan pay kasta, agtultuloy pay laeng ti imbestigasyon dagiti otoridad ken panangduktal ti danyos iti insidente.
