LA UNION – Arestado iti dua a wanted persons ditoy syudad ti San Fernando iti insayangkat dagiti otoridad a Simultaneous Anti-Criminality Law Enforcement Operations (SACLEO) idi Agosto 2, 2021.
Kabilang a naarestar iti maysa a 31-anyos a babai, addaan ti dua a warrant of arrest gaputi kaso a less serious physical injuries wenno panangdangran, tubo ti Zamboanga City ngem residente itan ti Barangay Santiago Norte ditoy syudad.
Nupay kasta, nawaya-wayaan met laeng ti suspek kalpasan a nagpiyansa ti P12,000 para iti dua a kaso daytoy.
Kabayatanna, agtaltalinaed iti pagbaludan iti maysa pay a naarestar a wanted person, managan Benjamin Cariño, 71, residente ti Barangay Bangcusay ditoy syudad gaputi kaso a theft.
Iti pannakiuman ti Bombo Radyo La Union kenni PLT Emma Ruth Estrada, Police Community Relation Officer ti San Fernando City Police Station, kinuna na nga idi pay 2003 a napasamak ti insidente.
Iti Simultaneous Anti-Criminality Law Enforcement Operations (SACLEO) ket baro a termino iti sigud nga One Time Big Time (OTBT) nga all-out police operation tapno kamaten dagiti drug personalities, most wanted persons, ken dagiti indibiduwal nga agik-ikot ti loose firearms.
