Impasiguro ni Executive Secretary Lucas Bersamin a nainget ti panang-adal ni Presidente Ferdinand Marcos Jr. ti 2025 General Appropriations Act (GAA) sakbay a pinirmaan na kas linteg ita nga aldaw.
Segun kenni Bersamin, ‘very focused’ ken naannad ti Presidente ti panagaramid ti desisyon mainaig ti national budget.
“Mabusisi si Presidente mula sa umpisa. I can give you that assurance that the President is very focused, very prudent — Ilocano, eh,” kinuna ni Bersamin.
Innayon pay ti opisyal a ti nagbalin a motibasyon ti Presidente tapno tingitingen a naimbag ti national budget ket ti kinakurang ti source of funds ti gobierno isu ket rumbeng a dagiti laeng adda pagbanagan na ti pakaipapanan ti pondo lalo kadagiti importante a proyekto ken programa ti pagilian.
Kumpiyansa ni Bersamin iti nagbalin a desisiyon ti Presidente, segun kenkuana, nu laeng ammo ti publiko ket bigat ken rabii iti panagtrabaho ti Chief Executive mainaig iti national budget.
