Nakailista ti Department of Health (DOH) ti pakabuklan a 28 a kaso dagiti nadundunor gapo iti palibang ita nga aldaw ti Paskua.
Iti advisory nga inruar ti ahensya ita a Disyembre 25 ket walo a kabaroan a kaso ti nailista manipud Disyembre 21 agingga Disyembre 25 ti alas-kwatro ti parbangon.
Kadaitoy a datos ket 68% dagiti biktima ti 19-anyos pababa. Kaadwan kadagiti naputuokan ket gapo kadagiti boga, 5-star, ken ti maaw-awagan a triangle.
Pinaregta ti DOH ti publiko a dagos nga iturong iti ospital dagiti biktima ken tumawag ti National Emergency Hotline a 911 para ti madagdagos nga atensyon-medikal.
Nupay kasta ket nababbaba latta ti 50% datoy a bilang nu idasig kadagiti 58 a firecracker-related injuries a nailista idi napalabas a tawen iti kapada nga aldaw. Ti datos ket nagtaud kadagiti 62 a sentinel hospitals a banbantayan ti DOH.
Kabayatanna, agpaot met ti holiday monitoring ti DOH agingga Enero 5, 2026, kasaruno ti panawagan a liklikan ti paputok para ti nataltalged a panagambak ti baro a tawen.
