BR LA UNION – Natay iti 3 a tattao gapu iti panagtud-tudo a ginubway ti shear line ken Intertropical Convergence Zone (ITCZ) iti sumagmamano a paset ti pagilian iti naudi a paset ti Disyembre 2024.
Segun kenni Office of the Civil Defense (OCD) USec. Ariel Nepomuceno, saan laeng a Davao ti naapektaran, ngem agraman pay iti Region 2, Region 11 ken 12, MIMAROPA iti nagsasaruno nga epekto ti 2 a weather system.
Impadamag pay ti opisyal nga adda 2 nga indibidual ti naipadamag a mapukpukaw.
Immunan nga impadamag ti National Disaster Risk Reduction and Management Council (NDRRMC) idi Miyerkoles a nagresulta iti layos ken panagregga-ay ti daga iti panagtudtudo a ginubway ti Intertropical Convergence Zone kadagiti paset ti Davao Occidental, Davao del Sur ken Davao Oriental idi Disyembre 26.
Naapektaran pay ti nasurok a 16,000 a pamilya ken nadadael ti nasurok a 1,000 a babbalay.
Kabayatanna, impasigurado ti OCD official nga agtultuloy ti pannakikoordinar da kadagiti otoridad iti state weather bureau tapno ad-adda a mapapigsa ti panagsaganada iti epekto ti shear line ken ITCZ iti sumagmamano a paset ti pagilian.
