BR LA UNION – Natay amin dagiti uppat a naglugan iti small plane, a nagsuwek idiay Southend Airport, agarop alas 4:00 ti malem idi Domingo, Hulyo 13, kas kinumpirma ti London police.
Kasaruno ti insidente, nagrikep ti nasao nga airport ken nakanselar amin a flights.
Segun iti Essex Police, maysa a 12-metre plane ti nagsuwek, sumagmamano laeng a kanito kalpasan a nagtake-off idiay London Southend Airport.
Iti nagsuwek nga eroplano a Beechcraft B200 Super King Air ket kukua ti Dutch company a Zeusch Aviation.
Naggapo daytoy idiay Athens, Greece ken agturong koma idiay Pula, Croatia, sakbay nga agsubli idiay Lelystad, Netherlands, idi napasamak ti insidente.
Mapapati nga awan ti Briton kadagiti uppat a natay, a mapapati nga agpapada a gangannaet.
Segun kadagiti nakaimatang, bimmaliktad iti eroplano sakbay a nagsuwek iti kannawan, a naggubway ti napigsa a panagbettak.
Naaddaan pay ti evacuation iti sumagmamano a golf course nga asideg iti nakapasamakan ti insidente.
