BR LA UNION – Inarestar dagiti otoridad manipud City of San Fernando Police Station, iti maysa a drug suspect kalpasan a ginandat na ti aglako ti maipagarop a shabu.
Naisayangkat ti buy bust operation babaen ti pannakitinnulong ti Regional Intelligence Division 1 (RID1) ken Philippine Drug Enforcement Agency Regional Office 1 (PDEA RO1), idiay Barangay Catbangen, City of San Fernando, La Union agarop alas 12:00 PM idi kalman, Abril 23, 2025.
Iti suspek ket nabigbig kas maysa nga Street Level Individual (SLI), 44-anyos, ken residente ti nasao met laeng a barangay.
Nakumpiskar dagiti otoridad manipud iti ikot ti suspek iti 0.3 gramo ti maatap a shabu, mapatta-patta nga agbalor ti Php2,040.00.
Karaman pay a narekobre iti nagduduma a drug paraphernalia, ken marked buy-bust money a nausar iti nasao nga operasyon.
Iti suspek ket adda ita iti custodiya ti City Police ken sumangsango iti kaso a panaglabsing iti Republic Act 9165 wenno Comprehensive Dangerous Drugs Act of 2002.
