LA UNION – Lima a behikulo kabilang iti convoy dagiti DA officials iti nagkarambola iti kawatiwatan ti national highway, idiay Barangay Paringao, Bauang, La Union idi malem kalman.
Kabilang ditoy iti tallo a gov’t. vehicle ti Department of Agriculture ken dua a pribado a lugan, a pakaibilangan ti maysa a blue ranger a minaneho ni Jessy Buen ti Bantay, Ilocos Sur.
Iti eksklusibo nga interview ti Bombo Radyo La Union kenni Erwin Paurel, nagmaneho ti maysa a 4×4 nissan calibre, kinuna na a nakalugan ditoy da Dr. William C. Medrano, Undersecretary for Livestock ti DA ken Dr. Rolando Pardo.
Segun kenkuana, naggapo da idiay Pangasinan ken dumar-ay da iti maysa nga event ditoy San Fernando City, La Union idi mapasamak ti aksidente.
Naamwan a kadwa da ni Secretary William Dar iti biyahe ngem immunan ti nagluganan na isunga saan a karaman kadagiti nagkarambola a lugan.
Base iti inisyal a report, kellaat a nag-preno iti Innova nga adda iti sango kalpasan a linisyan na iti maipagarop a simmingit a motorsiklo, ngem daytoy metten ti nakaigapwan iti panagdidinungpar dagiti uppat pay a lugan nga adda iti likudan daytoy.
Nupay kasta, awan met iti naipadamag a nasaktan wenno nadunor iti insidente malaksid iti minor damages iti likudan ken sangwanan a paset dagiti behikulo.
