BR LA UNION – Inarestar dagiti otoridad iti lima nga indibiduwal a maipagarop a drug suspect kabayatan ti buy bust operation idiay Barangay Biday, San Fernando City, La Union idi rabii ti Martes, Enero 28.
Maibasar iti report manipud iti La Union Police Provincial Office nga idaulwan ni PCol. Heryl Bruno, dagiti suspek ket pakaibilangan ti maysa a babai ken uppat a lallaki, agpapada nga addaan ti umno nga edad, ken maibilang dagitoy nga street level individuals iti illegal drug trade, ken residente da iti Barangay San Agustin, Barangay Carlatan, ken Barangay Biday ditoy siyudad.
Kinumpiskar dagiti otoridad iti tallo a sachet ti maipagarop a shabu, mapatta-patta nga agdagsen ti 2 gramo ken addaan ti standard drug price a P13,600.
Kinumpiskar pay dagiti otoridad iti lima a pidaso ti bala ti caliber 38, dua a bala ti caliber 22, assorted drug paraphernalia, ken dadduma pay a non-drug evidence.
Segun iti San Fernando City Police Station, dagiti suspek ket mangisay-sayangkat ti pot session iti maysa a residential house idi dua kadagitoy iti naglako ti maysa a sachet ti maatap a shabu iti maysa a pulis a nagpammarang a poseur buyer.
Ibilang ni Col. Bruno iti nasao nga operasyon a ballaygi para iti agtultuloy a panangparmek ti panagraira ti iligal a droga ditoy probinsiya.
Kabayatanna, maisag-saganan dagiti kaso a maipila kontra kadagiti suspek, partikular ti panaglabsing iti Comprehensive Dangerous Drugs Act of 2022 ken Comprehensive Firearms and Ammunition Regulation Act.
