LA UNION – Nakatuding a mawaya-wayaan iti aganay 5,000 agingga 10,000 a persons deprived of liberty (PDLs) sakbay nga ag-paskua ita a tawen, segun kenni Bureau of Correction (BuCor) Director General Gregorio Pio Catapang Jr.
Maibasar daytoy iti baro nga implementasyon ti Rules and Regulations (IRR) ti Good Conduct Time Allowance (GCTA) law nga adda iti sidong ti Republic Act No. 10592, a mangkissay ti tawen a panagtalinaed dagiti PDL iti pagbaludan.
Idi Disyembre 2, pinirmaan ni Justice Secretary Jesus Crispin Remulla ken ti kabsatna a ni Local Government Secretary Jonvic Remulla ti narebisar nga IRR.
Maibasar iti naudi a ruling ti Korte Suprema (SC) mainaig iti IRR ti RA 10592, mapalubosan itan nga agaplay iti GCTA dagiti PDL a nakaaramid iti nakaam-ames a krimen.
Sakbay iti pinal a ruling ti Korte Suprema, maipalagip a dagiti nakaaramid ti heinous crimes ket saan da a mabalin nga agaplay ti GCTA.
Kabayatanna, pakabuklan a 500 a PDL ti naruk-atanen ti BuCor iti naduma-duma a pagbaludan ti pagilian sipud Oktubre 22, agdama a tawen a pakairamanan dagiti baro a nawaya-wayaan a 104 a PDL idi kalman, Lunes.
347 kadagitoy ti nakapag-serbi iti maximum sentence; 110 ti na-absuwelto; 21 ti nakagun-od iti probation; 20 ti nakagun-od ti parole ken maysa ti napalubosan nga agpiyansa.
