LA UNION – Nakailista ti 5 a volcanic earthquakes iti bulkan Kanlaon iti napalabas a 24 oras maibasar iti report ti Philippine Institute of Volcanology and Seismology (PHIVOLCS) ita nga aldaw ti Sabado.
Naobserbaran pay iti panangipugso ti bulkan ti 5,798 tonelada ti asupre ken nailista ti obscured plumes ken senyales a posible a bumtak manen ti nasao a bulkan.
Iti agdama, agtaltalinaed iti Alert level 3 ti bulkan, kaipapanan nga adda iti intensified wenno magmatic unrest iti bulkan.
Iti sidong ti nasao nga alerto, maibalakad iti panagakar dagiti adda iti 6-kilometer radius manipud iti summit ti bulkan ken maipawil ti panagtayab dagiti lugan pang-tangatang asideg iti tuktok ti bulkan Kanlaon.
Kabayatanna, iti datos ti National Disaster Risk Reduction and Management Council (NDRRMC) idi Biyernes, apektado pay laeng iti 11,791 a pamilya wenno kaibatugan ti 40,489 nga indibidwal manipud Western Visayas ken Central Visayas gaputi panagbettak ti bulkan idi aldaw ti Lunes.
Iti nasao a bilang, adda pay laeng iti evacuation centers ti aganay 15,440 nga indibidwal.
