LA UNION – Pinalagipan ti Commission on Elections Regional Office One dagiti kandidato iti napalabas a Barangay ken Sanggunian Kabataan Elections (BSKE) nga agsumite ti Statement of Contributions and Expenditures (SOCE) sakbay iti naituding a deadline a November 29, 2023.
Iti eksklusibo nga interview ti Bombo Radyo La Union kenni Atty. Reddy Ceralde Balarbar, Assistant Regional Director ti COMELEC Region 1 ken Acting City Election Officer ditoy City of San Fernando, kasapolan nga agsumite ti SOCE dagiti kandidato, nangabak ken naabak, kas maiyannurot iti allagaden ti komisyon.
Segun kenni Atty. Balarbar, saan a makapag-assume iti posisyon dagiti nangabak a kandidato nu saan da a makapag-sumite nga umuna ti SOCE.
Kabayatanna, inwaragawag pay ti opisyal nga iti honorarium dagiti kameng ti DepEd a nagserbi a poll workers ket mangrugi a maawat da inton Lunes, Nobyembre 6.
