BR LA UNION – Nasurok a 1,700 a bombero ti nagtitinnulong tapno sebseban iti kadackelan nga uram iti kabakiran idiay Japan.
Segun kadagiti opisyal, mapattapatta a 4,600 nga umili ti nakapasidong iti immediate evacuation advisories bayat nga agtultuloy ti panangsebseb ti gobyerno iti uram.
Ti uram a timpuar iti akin-amianan a paset ti Iwate region idiay Japan ket nakatayan ti maysa a biyag sipud nangrugi idi napan a lawas.
Kabayatanna, mapattapatta nga umabot ti 2,100 nga ektarya ti nauram idiay Ofunato, sipud idi Huwebes, maibasar iti datos ti Fire and Disaster Management Agency.
Kas sungbat, nagtitinnulong dagiti bombero manipud iti 14 a rehiyon, agraman iti Tokyo, ken 16 nga helicopter, agraman dagiti unit ti militar, tapno sebseban ti apoy.
Agingga idi weekend, 84 a pasdek ti nadadael gapu iti uram ken agtultuloy ti panangammmo ti pakabuklan a danyos dagiti nadadael a sanikua.
Maibasar iti rekord ti ahensiya, agarup 2,000 a tattao ti immakar iti lugar ken pinilida ti makipagnaed kadagiti gagayyem ken kakabagianda bayat a nasurok a 1,200 a tattao ti agtal-talinaed kadagiti evacuation center.
Nupay bimmassit ti nailista a bilang dagiti uram iti kabakiran idiay Japan sipud idi 1970, adda latta iti nai-record nga agarup 1,300 nga uram idi 2023.
Dagiti nasao nga uram ket kadawyan a mapasamak manipud Pebrero agingga iti Abril, a gapuanan ti namaga nga angin ken napigsa nga angin.
Mainaig iti daytoy, maysa a kitkitaen da a makagapo nu apay a kumarkaru ti uram idiay Ofunato ket gapu iti kinakurang ti tudo idi bulan ti Pebrero, agsipudta 2.5 milimetro (0.1 pulgada) laeng ti tudo a nairekord iti nasao a lugar, no idilig iti gagangay nga 41 milimetro iti nasao a bulan.
Maibilang daytoy a baro a record para iti kapautan a panawen nga awan ti panagtudo iti nasao a lugar, sipud pay idi 1967.
