BR LA UNION – Pinasingkedan manen ni Slovenian Foreign Minister Tanja Fajon ti suporta ti Slovenia iti 2016 Arbitral Ruling ken inallokoyna iti amin a pagilian a tungpalenda daytoy, sakbay ti historiko a panagbisitana ditoy Pilipinas.
Kinuna ni Fajon, ipeksa na ti pannakikaysa ti Slovenia iti Pilipinas iti sango dagiti karit iti seguridad ken international law idiay West Philippine Sea (WPS).
Maipalagip nga idi 2016, inbasura ti Arbitral Tribunal ti nine-dash line ti China, ngem agtultuloy ti saan a panangbigbig dayta ti Beijing.
Maibasar iti datos idi Enero 2025, 27 a pagilian ti nangipeksa ti suporta iti ruling, idinto a walo ti kimmontra .
Ni Fajon, ti kaunaan nga Slovenian foreign minister a sumarungkar ditoy Pilipinas, ket adda ditoy pagilian manipud Marso 10 agingga 12.
Makisinnarak kenni Presidente Ferdinand R. Marcos Jr. ken Foreign Affairs Secretary Enrique Manalo tapno mapatibker ti bilateral relations.
Kas agdama a miyembro ti UN Security Council (2024-2025), aktibo nga ilunglungalong ti Slovenia dagiti sangalubongan nga isyu, kabilang iti maritime security iti umadani a panagtataripnong iti sidong ti Greek presidency inton Mayo.
