BR LA UNION – Mangidatag ti asylum idiay The Netherlands ni sigud a presidential spokesperson Harry Roque.
Kinuna na a tumakder daytoy kas maysa kadagiti abogado ni sigud a presidente Rodrigo Duterte isunga nagdesisyon a pormal a mangidatag ti asylum.
Maibilang nga asylum-seeker ti maysa a tao a kumiddaw ti international protection.
Innayon na a nu maawat iti aplikasyon na ket maaddaan ti karbengan para iti “non-deportation” agingga a malpas iti imbestigasyon.
Malaksid daytoy ket maipaayan pay isuna ti “non-prosecution” gaputi illegal entry idiay The Netherlands ken agtalinaed daytoy a legal a simrek iti nasao a pagilian.
Maipalagip a karaman ni Roque iti qualified human trafficking case kontra kenni Cassandra Li Ong ken ti sumagmamano a tattao, gaputi POGO hub a Lucky South 99 Corp.
Addaan pay daytoy ti standing arrest order manipud House of Representatives kalpasan a pinatawan ti contempt ken naibilin a mabalud gaputi pannakapaay na nga isumite dagiti dokumento a mangilawlawag iti kellaat a panagbaknang na.
