BR LA UNION – Saan a makibiang ti Malakanyang iti panagkiddaw ti asylum ni Atty. Harry Roque idiay The Netherlands.
Segun ken ni Palace Press Officer Claire Castro, agtignay laeng ti Palasyo no adda maipila a kaso ken no adda arrest warrant kontra kenni Roque.
Immunan a pinagdudua-an ti Palasyo a dagus a maipaayan ni Roque ti asylum gaputi pammati a marigatan a paneknekan nga adda political persecution wenno panangidadanes kenkuana ditoy Pilipinas.
Kabayatanna, binalakadan ni Malacañang ni Roque nga umuna a depensaan ti bagina sakbay ti sabali a tao.
Daytoy ti reaksiyon ti Palasyo iti panagkiddaw ni Roque ti political asylum idiay Netherlands, ngem plano ti Makabayan bloc a lapdan iti asylum bid ti sigud a presidential spokesperson.
Imbaga pay ti opisyal, gaputa saanen a paset ni Roque iti legal team ni sigud a President Rodrigo Duterte para iti sangsangwen a kaso iti International Criminal Court (ICC), awan ngaruden ti rason tapno agtalinaed idiay Netherlands.
Kinuna na a nasken nga agawiden ditoy Pilipinas ni Roque, ken tutukan ti panangdepensa ti bagina kontra kadagiti reklamo a maibatbato kenkuana.
